Print this page..

వాతావరణ మార్పును తట్టుకొనే పంటల సాగు - యాజమాన్య పద్ధతులు

ఇటీవల కాలంలో అనిశ్చిత వాతావరణ పరిస్థితుల వల్ల ముఖ్యంగా తక్కువ వర్షపాతం, వర్షాలు ఆలస్యంగా రావడం లేదా త్వరగా ఆగిపోవడం, పంట మధ్య కాలంలో బెట్ట పరిస్థితులను చూస్తున్నాం. కొన్ని ప్రాంతాల్లో అకాల వర్షాలు, వరదలను, మంచును కూడా చూస్తున్నాం. తరచుగా సంభవిస్తున్న వాతావరణ హెచ్చు తగ్గుల కారణంగా రైతులు ఎంతో నష్టపోతున్నారు. అనిశ్చిత వాతావరణ పరిస్థితులు తరచుగా సంభవిస్తూ ఉండటం రైతులకే కాక దేశ ఆహార భద్రతకే సమస్యగా మారింది. రానున్న కాలంలో మన దేశ జనాభాకు కావాల్సిన ఆహరం సమకూర్చుకోవాలంటే వాతావరణంను అనుసరించి పంటలు సాగు చేయవలసిన అవసరం ఎంతైనా ఉంది.

ప్రత్యామ్నాయ పంటల సాగు - బెట్టను తట్టుకునే రకాలు :

ఋతుపవనాలు ఆలస్యంగా ప్రారంభమవడం వల్ల సాధారణంగా సాగు చేయు ప్రత్తి, జొన్న, మొక్క జొన్న మరియు దీర్ఘకాలిక కంది చివరి దశలో బెట్టకు గురికావడంవల్ల దిగుబడులు తగ్గుతున్నవి. ఈ పరిస్థితులను అధిగమించడానికి తక్కువ కాల పరిమితి గల పంటలను మరియు రకాలను సాగు చేసుకోవాలి.  కొర్రలో యస్‌.ఐ.ఎ- 3156, 3088. కందిలో పి.ఆర్‌.జి.-158, 176, ఎల్‌.ఆర్‌.జి.-52  రకాల ప్రవేశపెట్టడం జరిగినది. దీని వల్ల రైతులు మాములుగా సాగు చేసే రకాల కన్నా ఇవి కొంత బెట్ట పరిస్థితులను అధిగమించి మంచి దిగుబడులను పొందుతున్నారు. ముఖ్యంగా కొర్ర సాగుపై ఆసక్తిని పెంపొందించుకొని సాగు చేయడం జరుగుతున్నది. ఈ పంట సాగువల్ల బెట్ట పరిస్థితుల్లో కూడా మంచి దిగుబడులతో పాటు పశు గ్రాసం మరియు అధిక నికర ఆదాయాన్ని పొందుతున్నారు.

నేలలో తేమ శాతాన్ని పెంపొందించుట :

బెట్ట పరిస్థితులను తట్టుకోవడానికి వివిధ రకాల పంటల్లో సాళ్ల మధ్య లోతైన నాగలి సాలును (డెడ్‌ ఫర్రో) మరియు చాళ్లు వేయటం వల్ల నేలలో తేమ శాతం పెంపొందించబడి పంట చివరిదశలో బెట్టకు గురికాకుండా ఉండడం జరుగుతుంది.

అంతరపంటల సాగుపై అవగాహన కల్పించడం :

రైతులకు అంతర పంటల సాగువల్ల కలిగే ప్రయోజనాలను, సాగుచేసే విధానాలను వివరించి తదనుగుణంగా కంది + పెసర పంటలను, కంది + మినుము పంటలను, కంది + ఇతర చిరుధాన్యాలు 1:5 గా  మరియు కంది + ఆముదం పంటలను 1:1 గా సాగు చేయడం జరుగుతున్నది. దీని వల్ల రైతులు వర్షాభావ పరిస్థితులను అధిగమించి అధిక నికర ఆదాయాన్ని మరియు పశుగ్రాసాన్ని కూడా పొంద గలుగుతున్నారు.

చిరుధాన్యాల సాగు :

చిరుధాన్యాల పంటలు పండించే విషయానికి వచ్చినట్లైతే ఈ పంటలు తక్కువ వర్షపాతంలో అంటే 200 నుండి 600 మి. మీ. సంవత్సర సగటు వర్షపాతము నమోదయ్యే ప్రాంతాల్లో కూడా పండించుకోవటానికి అనుకూలమైనవి. బలహీనమైన తేలిక భూముల్లో కూడా సాగు చేసుకోవచ్చు. మెట్ట సేద్యానికి చాలా అనుకూలమైన పంటలుగా చెప్పవచ్చును. మారుతున్న వాతావరణ పరిస్థితులను తట్టుకునే శక్తి గల పంటలు. తక్కువ నీరు, తక్కువ ఎరువులు, అతి తక్కువ పురుగు మందులు అవసరం మేరకే ఈ పంటలకు వాడతారు. కాబట్టి తక్కువ ఖర్చుతో పంటను సాగుచేసుకోవచ్చు. ఎక్కువగా సన్న, చిన్నకారు రైతులు మరియు బంజరు భూముల్లో రైతులు లాభసాటిగా సాగు చేయుటకు అనుకూలమైన పంటలు ఈ చిరుధాన్యపు పంటలు. కొర్ర మరియు వరిగలు ఖరీఫ్‌లో జూన్‌-జులై, రబీలో సెప్టెంబరు-అక్టోబరులో విత్తుటకు అనువైన సమయం. అరికలు, సామలు మరియు ఊదలు జూన్‌-జులై లో విత్తుటకు అనువైన సమయం. విత్తన మోతాదు అరికలు, వరిగలు మరియు ఊదలో ఎకరాకు 4 కిలోలు, కొర్ర మరియు సామలు ఎకరాకు 3 కిలోల విత్తనం సరిపోతుంది. 

రచయిత సమాచారం

ఎం. సుధాకర్‌, సైంటిస్ట్‌ (అగ్రానమి), జి. ధనలక్ష్మి, సీనియర్‌ సైంటిస్ట్‌ & హెడ్‌, పి. నాగార్జున రెడ్డి, సైంటిస్ట్‌ (అగ్రికల్చర్‌ ఎక్స్టెన్షన్‌) కె.వి.కె యాగంటిపల్లె, ఫోన్‌ : 9440607424, 9494625339, 9440739378